أرباح اليوتيوب

11.8.12 كم تدفع يوتيوب لأصحاب المقاطع اللي عليها مشاهدات عالية ؟ من مدونة Stars-94 السلام عليكم .. من المعروف إن يوتيوب تعطي مبالغ مالية لأصحاب قنوات اليوتيوب اللي ينزلون مقاطع ويجيهم عليها مشاهدات عالية ، كثير كانوا يتساءلون عن المبلغ اللي يدفعه لهم الموقع ، فحسيت إن الموضوع يستاهل أبحث عنه و أنزل عليه موضوع أولاً : على شان تاخذ مقابل مادي لمقاطعك ، لازم تكون شريك في برنامج شركاء يوتيوب ، وهالشيء يتطلب تقديم طلب لليوتيوب و الموافقة على شروطهم . ( وفيها يوافقون عليك وفيها لأ ) . ثانياً : لازم يكون معك إذن لاستخدام أي ميديا مو تابعة لك وعليها حقوق ، و هالمسألة خطيرة جداً لأنك لو استخدمت شي مو لك بدون إذن ممكن توصل للمساءلة القانونية . ثالثاً : لازم ترفع مقاطع فيديو باستمرار ، بشرط أن تكون المشاهدات على المقاطع عالية . طيب خلصنا من الشروط ، كيف ممكن تكسب من خلال مقاطعك ؟ عشان تكسب ، يوتيوب أتاحت لك طريقة و هي عبارة عن وضع إعلانات قوقل على مقاطعك ( ويمكن لاحظتوا وجود الإعلانات النصية في أسفل بعض المقاطع أو أحياناً تشتغل على شكل فيديو في بدايتها ) ، فكلما زاد عدد مشاهدات فيديوهاتك ، كلما زاد عدد مشاهدات الإعلان الموجود في فيديوهات ، كلما دفعت لك يوتيوب أكثر ! مع ملاحظة إن الإعلانات تختلف باختلاف منطقة المُشاهد ، و محتوى المقطع . بالنسبة للمبلغ اللي تدفعه يوتيوب للشركاء ، قرأت مرة إنه غير ثابت يختلف من واحد للثاني ، و إن الشركاء غير مصرّح لهم بالإعلان عن هالمبلغ ! يعني خذ واسكت ! لكن في أكثر من مكان قرأت إنهم يعطون 0.0033 سنت مقابل المشاهدة الوحدة ( تساوي مبلغ صغيييير بالريالات ) ، يعني لو كان عندك مقطع عليه مليون مشاهدة بيجيك منه 3300 دولار يعني تقريباً 12375 ريال ( ميب شينة ) . حسب مدونة أجنبية ، يقول المدّون إن ري ويليام جونسون ( Ray William Johnson ) صاحب أشهر قناة على اليوتيوب ( Equals 3 ) احتمال إنه يكسب 2000 دولار يومياً عن طريق قناته على اليوتيوب !!! يعني تقريباً 7500 ريال سعودي يومياً !!! يعني بالشهر 225000 ريااااااااااال i_i الأرقام اللي جابها هالمدون غير دقيقة _مثل ما هو يقول _ ، لأن المبلغ يعتمد على عدد المشاهدات اليومية ونسبة زيارة الإعلانات الموجودة على المقاطع ، نسبة المشاهدات تختلف من يوم للثاني ، ونسبة زيارة الإعلانات صعب تحديدها بدقة ، لكن ممكن تكون صحيحة و ممكن تكون أكبر ! لأن ري ويليام جانسون عنده منتجات عليها شعار قناته مثل التيشيرتات و غيرها يبيعها ويتكسب من وراها فوق المكسب اللي ياخذه مقابل عدد المشاهدات ! الموضوع طويل جداً ، لكن الخلاصة إن السالفة فيها مكسب محترم ، يبيلك بس أفكار قوية و إنتاج مرتب وفريق عمل ذكي وفالك التوفيق